Витаминот D е витамин растворлив во масти, којшто е природно присутен во неколку хранливи производи. Витаминот D има улога во апсорпцијата и одржувањето на рамнотежата на калциумот и фосфорот, коишто, пак, ја овозможуваат нормалната минерализација на коските и се потребни за нивниот раст. Витаминот D има невромускулна и имуна функција. Концентацијата на 25(ОН)D е најдобар индикатор за витаминот D во телото. Овие концентрации не ги опфаќаат количините на витаминот D врзан и зачуван во ткивата.
Според најновите истражувања во медицинските центри, лица коишто имаат помалку од 30 nmol/L имаат дефицит на витамин D, оние коишто имаат од 30–50 nmol/L имаат потенцијален ризик за негов дефицит. Концентрацијата на 25(ОН)D од 50 nmol/L во серум ги задоволува 97,5 % од потребите од витаминот D на популацијата.
ИЗВОРИ НА ВИТАМИН D
Храна
Многу малку од хранливите производи во природата содржат витамин D. Свежите масни риби (лосос, туна и скуша) се најголем извор на витамин D.
Изложување на сонце
Ултравиолетовото (УВ) Б зрачење (290–320 nm) продира во кожата и притоа се создава витамин D3. Комплетното покривање на телото со облека го редуцира УВ-зрачењето околу 50 %, a при облачност и/или зголемено загадување се намалува зрачењето дури за 60 %.
Употреба на суплементи во исхраната
Во суплементите, витаминот D најчесто се наоѓа во две форми: D2 (ергокалциферол) и D3 (холекалциферол).
ЗНАЦИ ЗА НЕДОСТИГ НА ВИТАМИН D
Болки во мускулите и коските
Константна болка во коските е еден од основните знаци за недостиг на витаминот D. Телото ја гради коскената маса до околу 30 години и затоа може да се јави остеопорозата.
Често се чувствувате тажно
Депресијата и промените во расположението се често поврзани со недостиг на витаминот D во телото. Серотонинот, хормонот одговорен за расположението, е стимулиран од количината на витаминот D.
Висок крвен притисок
Хипертензијата може да биде еден од знаците на недостиг на витаминот D.
Умор и поспаност
Недостиг на витаминот D може да биде причина за хроничен умор. Овој симптом е особено изразен кај постарите лица.
Промени на расположението
Рецеторите за витамин D во мозокот се наоѓаат во истите делови од мозокот каде што се и центрите за расположение и емоции. Затоа, недостигот на витаминот D е тесно поврзан со ментални заболувања како што се стрес, анксиозност и депресија.
Дигестивни проблеми
Витаминот D помага нашиот дигестивен систем правилно да ги апсорбира мастите. Неговиот недостаток може да доведе до повеќе цревни проблеми како што се: интолеранција на глутен, воспалителни болести на цревата и Кронова болест.
Алергии
Тој игра важна улога во регулирањето на имуниот систем и неговиот недостиг може да предизвика разни алергиски реакции како: астма, алергии на храна, егземи и алергиски ринитис. Витаминот D заедно со цинкот игра многу значајна улога во создавањето на имуните клетки коишто нè заштитуваат од разни бактерии, вируси и други надворешни агенси.
Да бидеме подготвени со зголемен имунитет во борбата со вирусите и бактериите!
Мери Спасовска-Гичева, дипл. биохем.
Контакт:
ПЗУ ДИЈАГНОСТИКА ФАРМАХЕМ
тел.: 02/20 31 905, 02/240 33 55
моб.: 071/ 30 60 19
е-пошта: lab@farmahem.com.mk